Поранешниот македонски шампион Работнички официјално ги започна кадровските промени пред пролетниот дел од сезоната, промовирајќи две нови имиња во својот состав. „Романтичарите“ денеска ги претставија Зија Мерџани и Сухељ Мухареми, фудбалери од кои се очекува значаен придонес во борбата за опстанок во Првата лига.
Левиот бек Зија Мерџани пристигнува како искусно решение за одбранбената линија. 30-годишниот фудбалер зад себе има богато прволигашко искуство, со настапи за Шкендија и Струга Трим Лум, а со стружани беше дел и од генерацијата што ја освои историската шампионска титула. Со Работнички потпиша шестмесечен договор и ќе биде директно вклучен во мисијата за зачувување на прволигашкиот статус.
Покрај него, нов член на скопскиот тим е и Сухељ Мухареми, играч од средниот ред кој доаѓа од редовите на Шкупи. Поранешниот младински репрезентативец на Македонија треба да донесе свежина, енергија и стабилност во средината на теренот, во период кога секој бод ќе има огромно значење.
Работнички есенскиот дел од сезоната го заврши на претпоследната позиција со само седум освоени бодови, па јасно е дека пролетта ќе донесе пеколна борба за опстанок. Под водство на тренерот Муарем Муарем, клубот се обидува навреме да го засили ростерот и да ја зголеми конкуренцијата во сите линии.
Со овие два трансфери, Работнички испраќа јасна порака дека нема лесно да се откаже и дека до последно ќе се бори за останување во елитното друштво.
