Еурофарм Пелистер со убедливо второ полувреме стигна до победа над Тиквеш од 29-21 и со триумф ја заврши 2025 година. Клучниот момент се случи по паузата, кога „зелено-белите“ за краток период направија серија што целосно го скрши отпорот на гостите од Кавадарци.
Иако битолчани настапија без Радивојевиќ, Манасков и Хосни, првите 30 минути не навестуваа лесна задача. Тиквеш долго време имаше резултатска предност, а во 20. минута поведе и со 9-6. Сепак, домаќините успеаја да го стабилизираат ритамот и со мини-серија пред крајот на полувремето да заминат на одмор со 12-10.
Продолжението донесе сосема поинаква слика. Пелистер ја подигна агресивноста во одбраната и со брзи голови направи серија што донесе двоцифрена предност (25-15), по што исходот беше решен. До крајот разликата само се зголемуваше, а натпреварот мирно беше приведен кон крај.
Со оваа победа, Еурофарм Пелистер останува втор на табелата со четири бода помалку од лидерот Вардар, додека Тиквеш ја завршува годината на петтата позиција со 18 бодови, колку што има и Бутел.
