Вардар 1961 ја продолжува доминацијата во домашното првенство и вечерва впиша уште една голема победа – триумф од 26-28 на жешкото гостување во Охрид. Во атмосфера каде тешко се освојуваат бодови, црвено-црните го задржаа максималниот ефект и ја впишаа 14. победа во исто толку натпревари.
Дуелот во СРЦ „Билјанини Извори“ оправда сè што носи епитет дерби – полни трибини, силен интензитет и две мотивирани екипи. Вардар подобро го отвори мечот, се одлепи на 1-4, па и на 6-10, користејќи го силниот офанзивен ритам и брзата транзиција. Но Охрид не се предаде.
Преку расположените Стрмљан, Иванковиќ, Крсманчиќ и Ѓукиќ, домаќините ја стопија негативата и на полувреме заминаа со само еден гол заостаток (13-14).
Најголема закана за охридската одбрана беше Украинецот Дмитро Хориха, кој уште во првиот дел уфрли шест гола и беше нерешлива енигма за одбранбената линија на Борис Ројевиќ.
Во продолжението Вардар повторно го крена темпото, врати контролирана игра и стигна до највисоките +5 (20-25). Иако Охрид успеа да намали и да внесе одредена доза неизвесност, сепак, искуството и зрелоста на двапати европскиот шампион беа пресудни во последните десет минути.
Двојниот удар за Вардар беше црвениот картон на Јанковски во 48. минута, но дури и со скратена ротација гостите успеаја да ја задржат предноста. Голманот Милош Валах имаше клучни интервенции, меѓу кои и зицерот на Ѓукиќ, со што го олесни патот до победата.
Хориха беше прво име на натпреварот со осум гола, следен од Кавада со шест. Кај Охрид, четворица ракометари постигнаа по пет погодоци – Стрмљан, Иванковиќ, Крсманчиќ и Ѓукиќ.
Со новиот триумф Вардар останува единствениот тим со максимален учинок, цврсто поставен на врвот и со јасна порака дека и оваа сезона оди по титулата.
