Ангела Мојсовска имаше одличен настап во групната фаза на Светското првенство во карате за сениори што се одржува во Каиро, Египет. Нашата репрезентативка забележа две важни победи и еден пораз, резултат кој и донесе пласман меѓу најдобрите 16 на турнирот.
Мојсовска ја заврши групната фаза на второто место во групата 7, зад домашната натпреварувачка Хадир Хенди од Египет, која го освои првото место. Во оваа силна група, третата и четвртата позиција им припаднаа на претставничките на Украина и на САД, што дополнително ја нагласува тежината и квалитетот на конкуренцијата.
Со ваквиот успешен настап, Мојсовска го обезбеди својот пласман во осминафиналето, каде што ја очекува нов предизвик – дуел со Анастасија Велозо од Чиле. Натпреварот ќе биде важен тест за нашата каратистка која со досегашните резултати покажа дека е подготвена за големи успеси на светската сцена.
