Во првиот натпревар од претквалификациите, селекцијата на Македонија стигна до сигурна и убедлива победа против Азербејџан. Пред домашната публика во СРЦ „Кале“, избраниците на селекторот Марјан Илиевски доминираа во сите сегменти на играта и најавија силен старт во групата „А“ на претквалификациите за Евробаскет 2029.
Македонија одигра одлично прво полувреме, особено во одбраната. Во првите 20 минути им дозволивме на гостите само 21 поен, додека ние реализиравме 40. Јакимовски отвори одлично со 10 поени во првата четвртина, а заедно со капитенот Војдан Стојановски ја иницираа клучната серија која донесе водство 22:13. Во втората четвртина следеше нов силен напад, со кој се одвоивме на 40:21 на полувреме.
Во продолжението Македонија ја контролираше играта и резултатот. Јакимовски со атрактивни потези стигна до 20 поени за водство 63:36, а Зеќири се приклучи со двоцифрен учинок. Во последната четвртина селекторот Илиевски им даде минутажа на сите играчи, кои ја зголемија позитивата до конечниот убедлив триумф.
Статистички, Јакимовски беше најдобар со дабл-дабл од 25 поени и 11 скока. Стојановски запиша 16 поени и 11 скока, а Зеќири реализираше 17 поени. Дебитантот Омари Мур имаше 6 поени, 6 скока и 9 асистенции.
Во следното коло, на 30 ноември, Македонија гостува во Даблин за дуел со репрезентацијата на Ирска.
