Викендов во Скопје се одржа македонскиот боксерски турнир „Златен гонг“.
Македонскиот боксер на „Пелистерски јунак“, Ален Рустемовски, го освои меѓународниот боксерски турнир „Златен гонг“, кој и оваа година го собра најдоброто од домашниот и странскиот бокс.
Рустемовски ја прикажа најдобрата борба на турнирот, кренајќи ја публиката во салата „Борис Трајковски“ на нозе со својата борбеност и извонредна техника. Битолчанецот славеше со едногласна одлука против англискиот боксер Џозеф Тарнер.
По големата победа, Ален Рустемовски се огласи на својот Фејсбук-профил со емотивна порака: „Голема чест и вистинска привилегија е да го освојам трофејот ‘Златен гонг’. Овој турнир има долга историја и голема тежина — и денес моето име се запиша меѓу шампионите. Гордо го носам ова признание како доказ за секој тренинг, секоја жртва и борби што никој не ги гледа. Ова не е сао трофеј…ова е момент што ќе го паметам цел живот. За Македонија.“
На турнирот беа доделени и специјални признанија. За најдобар македонски боксер беше прогласен Адријан Рустемовски, додека титулата најдобар странски боксер ја освои Даврон Бозоров. Наградата за најдобар техничар му припадна на Џозеф Тарнер од Англија. Рио Гордон од Англија и Наум Стојаноски беа прогласени за најборбен пар.
Михал Мунетан од Молдавија беше избран за најдобар тренер, а Роберт Винеман ја доби наградата за најдобар судија.
