Денес на програмата се натпреварите од петтото коло во Општинската фудбалска лига – Струмица, односно четвртата лига по ранг на натпреварување.
Во Радово, екипата на Напредок ќе го пречека тимот на Огражден. Интересен дуел, особено ако се земе предвид фактот што Напредок сè уште го бара својот прв позитивен резултат – има четири порази на четири одиграни средби и е единствениот тим без бодови. Од друга страна, Огражден од Ново Село ќе атакува на својата втора победа сезонава.
Во селото Дрвош, истоимената екипа Дрвош ќе игра против Интер Kукла од Куклиш. Ова е дербито на колото – дуел што може да донесе промена на врвот на табелата. Со евентуална победа, и Дрвош и Интер Кукла би можеле да се искачат на првото место, но само под услов лидерот Спартмани загуби.
На врвот е тимот на Спартмани од Балдовци – единствената екипа без пораз, со скор од три победи, едно реми и вкупно 10 бодови. Спартмани на свој терен ќе го пречека Единство од Пиперово, тим што има три бодови, една победа и три порази и се наоѓа на претпоследното место на табелата.
Во Добрејци, Илинден ќе биде домаќин на Слога од радовишко Злеово. Натпревар во кој домаќинот влегува како благ фаворит – со три освоени бодови може значително да напредува на табелата. Слога, пак, со биланс од една победа, едно реми и два порази, се надева дека може да дојде до триумф и да избега од долниот дел.
Сите натпревари од ова коло се играат денес со почеток од 13:00 часот.
