Охрид повторно ја чувствува онаа препознатлива ракометна енергија што се буди пред големите натпревари. Оваа недела носи куп-возбудување во „Билјанини Извори“, а домашниот тим влегува во дуелот со јасна мисла – да ја одбрани својата ракометна Тврдина и да ја продолжи победничката серија.
Атмосферата околу екипата е полна со самодоверба, но и со чувство за одговорност, а дополнителен импулс дава и новиот голман Кристијан Пилиповиќ, кој пристигна од Кадетен Шафхаузен и веднаш внесе сигурност и смиреност во тимот.
Еден од чуварите на Охридската ракометна Тврдина- Кристијан Пилиповиќ, нагласува дека Охрид има квалитет да доминира ако ја повтори играта од најсилните натпревари оваа сезона и ако сите заедно го дадат максимумот. Тој верува во фаворитската улога, но предупредува дека тоа мора да се докаже со работа, борба и концентрација на теренот.
„Искрено, не би сакал никого да потценам, меѓутоа ако сме ,,вистинските ние” на терен, како во натпреварот со Алкалоид, на пример… и ако сите играме со 100% од себе, мислам дека сме фаворити, но секако тоа мора прво да се покаже на терен.“- изјави голманот на Охриѓани.
Недела во Охрид носи ракометна вечер полна со адреналин – момент кога тимот ќе може повторно да покаже што значи борбен Охрид на свој терен.
