Во Валандово владее вистинска фудбалска еуфорија пред последниот есенски домашен натпревар на ФК Победа Валандово, кој ќе се одигра во недела, 16 ноември, од 13:00 часот на Градскиот стадион. Противник е екипата на ФК Карбинци, тим кој оваа сезона покажува солидни партии и моментално се наоѓа на петтото место на табелата со 13 бодови.
Но, сите очи се вперени кон Победа – единствениот непoразен тим во Трета лига – Исток, кој со фантастични 22 бодови го држи врвот. Тимот од Валандово игра одличен фудбал, покажува стабилност и доминација, а токму ова коло може да ја круниса есенската полусезона со титула.
Победа со евентуален триумф станува есенски шампион, што би бил огромен успех и мотив за продолжение на борбата за влез во повисок ранг. Цена на билет е 100 денари.
Клубот ги повикува сите навивачи, љубители на фудбалот и жители на Валандово да дојдат и да создадат атмосфера каква што само овој град знае.
“Ги повикуваме сите наши сограѓани, навивачи и поддржувачи да дојдат и да создадат вистинска фудбалска атмосфера! Вашата енергија и поддршка се она што нè води напред — вие сте нашиот 12-ти играч! Да покажеме уште еднаш дека Валандово живее за фудбалот”, велат од валандовскиот третолигаш.
