Вардар ја продолжи доминацијата во Супер лигата и со комбиниран состав ја запиша 12. последователна победа, славејќи убедливо над Струга со 36-21. Мечот практично беше решен уште во првите минути, бидејќи гостите тешко го следеа темпото поставено од „црвено-црните“.
Иако Чупиќ ги поштеди дел од носителите на играта – како Валах, Малус и Борозан, а недостасуваа и повредените Еспиња, Кеита, Лазаревски и Стаменковиќ – Вардар брзо изгради висока предност. Во првиот дел Гогов блесна со седум одбрани, пет удари на стативата дополнително го отсликаа притисокот, па резултатот 16-9 беше сосема очекуван.
Во продолжението, тренерот им даде повеќе простор на младите Стојановски, Ќосевски, Танкоски и Богдановски. Разликата само растеше и во 43. минута достигна +12 (24-12), а Струга немаше начин да се врати во игра.
Кај победниците најефикасен беше Харуки Кавада со шест гола, а веднаш зад него Танкоски со пет. За Струга најдобар стрелец беше Стефан Атанасовски со четири погодоци.
Во следното коло Вардар го пречекува Еурофарм Пелистер 2, додека Струга на домашен терен ќе игра против Охрид.
