Ракометарите на Охрид продолжуваат со победничката серија — петта по ред, откако на домашен терен убедливо ја совладаа екипата на Пролет со 30-20 (13-11). Со овој триумф, охриѓани го зацврстија четвртото место на табелата, додека скопјани паднаа на осмата позиција.
Иако првото полувреме беше израмнето, а Пролет неколкупати стигнуваше до резултатска рамнотежа (11-11), вториот дел целосно им припадна на „гладијаторите“. За само неколку минути по одморот, поведоа со 17-12 и до крајот ја одржуваа високата разлика, која во финишот достигна и десет голови.
Гоце Ојлески со осум погодоци беше прв стрелец, Младен Крсманчиќ додаде пет, а голманот Бојан Блажески блескаше со 17 интервенции. Кај гостите се истакна Андреј Стојановски со шест погодоци, а четири постигна Давор Палевски.
