Како што дознава Спортска Мрежа, по само неколку кола од стартот на сезоната во Првата лига, ракометниот клуб Вардар Неготино и тренерот Пепи Манасков се разделија, а одлуката е донесена по заеднички договор, со цел екипата да направи нов чекор напред во резултатска смисла.
Неготинци, кои во летниот период најавија високи амбиции и борба за највисок пласман, во првите натпревари не успеаја целосно да ги оправдаат очекувањата. По гостинските порази од Младост во Богданци во рамки на третото коло (31:28), и од Текстилец во Штип со резултат 35:33 во меч од 5 .коло, клубот реши да направи промена на клупата и да побара ново решение за тренерската позиција.
Манасков, кој летоска ја презеде екипата со јасна цел да ја вклучи во битката за врвот, сепак не успеа да ја стабилизира формата на тимот во првите кола. И покрај тоа, во Неготино останува почит кон неговата работа и искуство, а сите страни се разделуваат во коректна атмосфера.
Во наредниот период ќе биде познато кој ќе го предводи Вардар Неготино. Тимот веќе во следното коло ќе има можност за рехабилитација, но ќе биде исправен и пред сериозен предизвик, бидејќи ќе игра дерби кога на домашен терен ќе го пречека составот на Драчево Јуниор.
