Екипата на Слога Виница дефинитивно не ја започна сезоната според планот – повратникот во Втората лига е на самото дно од табелата со три освоени бодови, а тимот на Емил Грнев има седум пораз и еден триумф од второто коло.
Серијата на порази за тимот од Виница е голема, дури шест последователни порази, па според формата од последните пет натпревари, екипата на Слога нема освоено бод, а од можни 15.
Ако се погледне тимот кој го има Слога, тогаш дефинитивно е разочарување бидејќи по квалитет Слога и не е така лоша.
Иван Настевски – популарниот Меси, Тони Мирчевски, Марко Софијаноски, Сухејб Рушити, Никола Талески, Тони Мирчевски, младите Александар Илиев, Октај Амедов, Михаил Воинов, Андреј Воинов, тука се и Љупчо Христовски, Христијан Кукески, Виктор Крстевски, голманот Антонио Столески…. само дел од играчите кои се во Слога Виница, но поразите се нижат како на брза лента.
Слободниот викенд поради локалните избори за Слога Виница ќе биде добредојден да се консолидира тимот и да изнајде начин како до триумф и тоа само втор во тековната сезона, бидејќи од коло во коло борбата за директен опстанок ќе станува се потешка мисија.
Преспа од Ресен е во иста ситуација, тимот е со идентична форма како и тимот од Виница, со еден триумф и седум порази и со пет порази од последните пет натпревари.
Дефинитивно и кај тимот од Ресен ќе треба да се размислува како ќе се продолжува и како ќе се бараат бодови со цел Преспа да биде конкурентна на патот кон опстанок во Втората лига.
Дефинитивно влијание врз ваквите резултати има и тоа што Преспа покасно започна со подготовките бидејќи „до 5 до 12“ не се знаеше дали ќе игра во Втора лига по откажувањето на Беса од понатамошно натпреварување.
Битката за секој бод станува многу важна, последните пет екипи од 16-тото до 12-тото место ќе ги спакуваат куферите и ќе се преселат во Трета лига, а пак екипите позиционирани на 11-тото, 10-тото и деветтото место ќе играат бараж за можен опстанок.
