Европската ракометна федерација го објави списокот на официјални лица за шестото коло во Лигата на шампионите, а меѓу нив повторно се најдоа и македонските арбитри Димитар Митревски и Благојче Тодоровски.
Нашиот судиски двоец ќе ја дели правдата на престижниот дуел меѓу Висла Плоцк и најтрофејниот клуб во историјата на натпреварувањето — Барселона. Делегат на натпреварот ќе биде Чехот- Јири Конечни.
Средбата ќе се одигра на 23 октомври, во прочуената „Орлен Арена“ во Полска, со почеток во 20:45 часот.
Ова ќе биде уште едно големо признание за македонското судиско дуо, кое со својата конзистентност и професионализам сѐ почесто добива доверба за најатрактивните натпревари во елитната Лига на шампионите.
