Младото лево крило на ГРК Охрид, Христијан Пупунцоски, ја искористи шансата во натпреварот против Баки, кој охридскиот тим го доби со убедливи 38-21, обезбедувајќи пласман во третото коло од ЕХФ Европскиот Куп.
Пупунцоски, како и другите млади ракометари од охридската школа, доби шанса од стратегот Борис Ројевиќ и ја оправда со одлична игра, постигнувајќи два гола во натпреварот.
Веднаш после мечот, за Спортска Мрежа, тој изјави:
„Мило ми е што добив можност да играм денес, ми се исполни желбата и сонот да играм за Охрид на еден ваков меч, од европски карактер. Можеби денес натпреварот беше само формалност, бидејќи веќе изборивме пласман со големата победа вчера, меѓутоа јас ќе го паметам овој меч бидејќи беше мое деби и се надевам дека се прикажав во добро светло.“
Со вакви настапи, Пупунцоски и останатите млади таленти најавуваат дека иднината на охридската ракометна школа е сигурна, а тимот е подготвен за следните предизвици на европската сцена.
