Европската ракометна федерација (ЕХФ) е пред одлука со која значително ќе се смени изгледот на Лигата на шампиони во машка конкуренција. Според најавите, од следната сезона натпреварувањето ќе биде проширено од сегашните 16 на 24 екипи, што ќе донесе нов систем на натпреварување, но без да се зголеми бројот на натпревари во календарот.
Во првата фаза, 24-те клуба ќе бидат поделени во четири групи со по шест екипи. Првите три места од секоја група ќе обезбедат пласман во т.н. Главна рунда – нова фаза во која ќе се формираат две групи со по шест екипи. Таму ќе продолжат дванаесетте најдобри, а бодовите од групната фаза ќе се пренесат. Четвртопласираните екипи од групите ќе го продолжат настапот во ЕХФ Европската лига.
Од Главната рунда, првите четири екипи ќе обезбедат пласман во четвртфиналето, кое претставува вовед во нокаут делот. Победниците од четвртфиналните дуели ќе обезбедат место на традиционалниот Фајналфор турнир, кој останува во истиот формат.
Со овој систем, екипите ќе одиграат по 10 натпревари во првата фаза, уште шест во втората, плус четвртфинале и можен настап на завршниот турнир, што значи дека вкупниот број на мечеви нема да биде значително зголемен. Според ЕХФ, ова е начин да се даде шанса на повеќе клубови и земји да бидат дел од елитата, без да се наруши рамнотежата во календарот.
Конечната одлука треба да ја донесе Извршниот одбор на ЕХФ во периодот што следува, а блиски извори до федерацијата на некои реномирани ракометни портали велат дека овој модел има големи шанси да стане реалност.
