Поранешниот македонски фудбалски селектор Игор Ангеловски – познат како Мрме – ја продолжува својата тренерска кариера со нов предизвик во Кипар. Тој е именуван за нов тренер на прволигашот Етникос Ахна, клуб кој во својата историја често бил поврзуван со македонскиот фудбал.
Во Етникос низ годините настапувале 17 македонски играчи, а особено значајна улога имаше голманот Мартин Богатинов кој со 175 настапи остана запаметен како клупска легенда.
За 49 годишниот стратег ова е четврти клуб во кариерата и трет интернационален ангажман. Тренерската караиера ја започна во Работнички, каде остави најдлабока трага, а потоа како селектор ја водеше Македонија на историското Европско првенство во 2021 година. По тоа следуваа пократки, но помалку успешни епизоди во хрватска Горица и казахстански Каспиј.
Кипарскиот клуб официјално го претстави преку своите канали и потврди дека прв асистент на Ангеловски ќе биде Милан Илиевски – долгогодишен негов соработник кој беше дел и од стручниот штаб на репрезентацијата.
Со оваа нова соработка, Етникос Ахна очекува стабилност и напредок во лигата, а Ангеловски добива нова можност да ја зацврсти својата позиција меѓу македонските тренери со европско искуство.
