Навивачката група „Ѕверови“ од Брвеница оваа година одбележува голем јубилеј – три децении постоење и верност кон својот клуб Вардар Брвеница и локалниот спорт. Поводот ќе биде прославен со богат и незаборавен настан, кој ќе ги обедини старите и новите генерации во духот на спортот и пријателството.
Главниот дел од програмата ќе започне во сабота, на 27 септември 2025 година, со ревијален натпревар помеѓу ФК Вардар Брвеница и ФК Тетекс (ветерани). Дуелот, кој сигурно ќе привлече многу љубители на фудбалот, ќе започне во 18:00 часот на стадионот во Брвеница.
По натпреварот, прославата продолжува во спортската сала „Коста Рацин“ во Брвеница, каде што сите присутни ќе имаат можност да уживаат во вистинска фешта исполнета со музика, дружење и изненадувања. Организаторите најавуваат бесплатна храна, пиво и сокови во неограничени количини, а за атмосферата ќе се погрижат Група Глорија, Ѓоко Танески и DJ Мастер, кои ќе го подигнат адреналинот со најдобрите хитови.
Навивачката група „Ѕверови“, која зад себе има три децении поддршка, верност и љубов кон својот клуб, порачува дека оваа прослава не е само спортски настан, туку и симбол на заедништво и сплотеност.
„Вашето присуство ќе биде најголемиот подарок за сите нас“, порачуваат организаторите, кои ги покануваат сите љубители на спортот и добрата забава да бидат дел од оваа значајна спортска приказна.
