Четири македонски кошаркарски судии ќе бидат дел од судиската листа на АБА лигата за претстојната сезона 2025/26. Тие го положија задолжителниот претсезонски семинар кој се одржа овој викенд во Бања Лука, во организација на раководството на регионалното натпреварување.
На веќе етаблираните Александар Давидов, Боро Антовски и Никола Јакимовски, оваа сезона им се приклучува и Дејан Зафировски, кој успешно го мина тестирањето и ја заокружи македонската судиска „четворка“. Тие ќе бидат на располагање на одговорните лица за судискиот и делегатскиот сектор во АБА лигата – Срѓан Дожаи и Саша Маричиќ, претседател на Судиската комисија.
Во улога на супервизор-опсервер, како и во претходните сезони, ќе продолжи да делува Александар Милојевиќ, додека на делегатската листа се наоѓаат Антонио Теофиловски, Бобан Јосифовски, Зоран Николовски и Сашко Терзиевски, кои веќе подолг период ја извршуваат оваа функција во регионалното натпреварување.
Во новата сезона, македонската клупска кошарка ќе има свои претставници во АБА 2 лигата, преку актуелниот шампион МЗТ Скопје Аеродром и финалистот на плеј-офот ТФТ Скопје.
