Возбудливо седмо коло во Првата македонска фудбалска лига. Струга Трим Лум и Брера Струмица извојуваа значајни победи во дуелите против Силекс и Арсими.
Во Кратово, во вистинска фудбалска ревија, Струга ТЛ славеше со 1:3 против Силекс. Гостите од Струга уште во 8. минута поведоа преку Компаоре, а во 33. минута Мемедриза Хамза со атрактивен слободен удар го зголеми водството. Домашните успеаја да се вратат во 41. минута преку Хрвановиќ, кој намали на 1:2.
Во вториот дел Силекс имаше неколку големи шанси за израмнување, но одбраната и голманот Анџелети беа на висината на задачата. Точката на триумфот ја стави младиот Зенку во судиското надополнување, за конечни 1:3. Со оваа победа, Струга ТЛ се врати на лидерската позиција во ПМФЛ заедно со Вардар.
Во Струмица, Брера ја запиша својата втора сезонска победа совладувајќи го Арсими со 2:1. Гостите поведоа во 34. минута преку Армин Бесагиќ, но домашните израмнија пред полувремето, кога Стефан Наумчески беше највисок по еден корнер и погоди за 1:1.
На стартот од второто полувреме, Миле Тодоров со прецизен удар ја донесе Брера во водство од 2:1. До крајот на натпреварот Арсими се обидуваше да израмни, дури и постигна гол кој беше поништен поради офсајд, но бодовите останаа во Струмица.
Со триумфите, Струга ТЛ и Брера ги зацврстија своите позиции – стружани во самиот врв, а струмичани во средината на табелата.
