Македонската фудбалска репрезентација до 19 години на 6 септември одигра контролен натпревар против Босна и Херцеговина во Радовиш, а со тоа Градскиот стадион повторно беше домаќин на едно национално фудбалско случување по цели три децении.
Последен пат, во април 1995 година, младата репрезентација на Македонија до 21 година одигра меч против Бугарија, кој заврши со убедлива победа од 7-2.
Со успешната организација на дуелот против Босна и Херцеговина, стадионот во Радовиш докажа дека располага со одлични услови – квалитетен терен, добра инфраструктура и сигурна организација на мечеви од репрезентативен карактер. Фудбалската федерација на Македонија го оцени домашниот испит на најдобар можен начин, па како потврда за тоа, Радовиш ќе биде домаќин на уште два нови натпревари.
На 16 и 18 април, љубителите на фудбалот во Радовиш ќе имаат ретка прилика повторно да уживаат во репрезентативна атмосфера, овој пат со настапите на селекцијата на Македонија до 17 години која ќе се соочи со Кипар.
За градот, ова е голем спортски настан, а за македонскиот фудбал – уште една потврда дека низ целата држава постојат услови за организација на врвни натпревари.
