Со стартот на новата сезона во Лигата на шампионите, Европската ракометна федерација (ЕХФ) потсети на вечната листа на најдобри стрелци во историјата на ова елитно натпреварување. На нејзиниот врв неприкосновено стои македонската ракометна легенда и најдобар десен бек во историјата на европскиот ракомет – Кирил Лазаров.
Лазаров е апсолутен лидер со неверојатни 1.468 погодоци, бројка која со години останува недостижна. Зад него се наоѓаат:
-
Тимур Дибиров – 1.212 голови
-
Никола Карабатиќ – 1.198 голови
-
Микел Хансен – 1.138 голови
-
Момир Илиќ – 969 голови
Името на Лазаров блескаше во елитниот европски ракомет цели две децении. Тој остави длабока трага настапувајќи за ракометни гиганти како Загреб, Веспрем, Сиудад Реал, Атлетико Мадрид, Барселона, а својата играчка кариера ја заврши во францускиот Нант.
Неговата голгетерска особина и понатаму претставува репер за идните генерации, а факт е дека Македонија засекогаш ќе биде запишана на врвот на европската ракометна историја преку делото на Кирил Лазаров.
