Возбудлив натпревар се одигра денес во Куманово, каде што Шкендија Арачиново по драматична пенал-серија ја совлада Каменица Саса и обезбеди место меѓу најдобрите 16 екипи во Купот на Македонија.
Регуларниот дел заврши 1:1, па победникот мораше да се решава по изведување на пенали.
Првото полувреме мина без погодоци, но не и без возбудувања. Во 30. минута Филип Спенџарски од редовите на Каменица Саса ја погоди стативата, додека во самиот финиш на првиот дел, во 45. минута, Александар Ѓорѓиески од Шкендија Арачиново не реализираше удар од белата точка, па мрежите останаа да мируваат.
Во вториот дел Саса прва го отвори резултатот преку Спасовски, а потоа Шкендија остана со играч помалку поради вториот жолт картон за Коцев. Сепак, и покрај бројчаната негатива, тимот од Арачиново покажа храбра и офанзивна игра, без да се почувствува дека игра со човек помалку.
Искусниот Алији во самиот финиш успеа да израмни на 1:1 и да ја однесе средбата во пенал-рулетот.
Во серијата пенали, Шкендија Арачиново беше посмирена и поконцентрирана, реализираше повеќе удари и заслужено обезбеди место во осминафиналето на Купот на Македонија.
