Поранешниот македонски репрезентативец и долгогодишен капитен на германски Мајнц, Николче Новески, официјално се приклучи на тимот на Фудбалската федерација на Македонија.
Новески е назначен за раководител на скаутинг службата, со задача да ја развива стратегијата за следење и откривање на млади таленти со македонско потекло ширум Европа и светот. Оваа активност е дел од новите приоритети на ФФМ, со цел да се прошири базата на фудбалери за сите национални селекции и да се создаде поголема перспектива за македонскиот фудбал.
Со 64 настапи за македонската репрезентација, Новески ќе работи во координација со Горан Пандев, Ѓорги Христов и Агим Ибраими. Неговата улога ќе вклучува следење на таленти, организирање тест-натпревари надвор од Македонија и давање шанса на младите да се докажат.
„Среќен сум што станувам дел од тимот на ФФМ и што ќе можам да придонесам за развојот на македонскиот фудбал. Со моето искуство од Бундеслигата и заедно со тимот во Федерацијата, ќе изградиме силен систем на скаутинг кој ќе овозможи секој талентиран фудбалер со македонско потекло да добие шанса да се докаже. Нашата цел е да создадеме услови за напредок и уште посилни национални селекции во иднина“, изјави Новески.
Претседателот на ФФМ, Масар Омерагиќ, го поздрави ангажманот на Новески:
„Николче Новески е име кое со својот карактер и настапи е запаметено во Македонија и во германската Бундеслигата. Задоволство е што ваков професионалец прифати да биде дел од нашиот тим, заедно со Пандев, Христов и Ибраими. Верувам дека со неговото искуство, авторитет и познавања ќе изградиме систем кој ќе донесе нови имиња во нашите селекции. Нашата мисија е јасна – ниеден фудбалски талент со македонско потекло да не остане незабележан. Ова е силен чекор напред во модернизацијата и професионализацијата на нашата работа“.
