Македонската фудбалска репрезентација до 21 година ги започна подготовките за новиот квалификациски циклус за пласман на Европското првенство 2027.
Избраниците на селекторот Горан Станиќ квалификациите ќе ги отворат на 5 септември со гостување кај Полска во Краков, додека четири дена подоцна, на 9 септември, во Битола ќе ја пречекаат селекцијата на Италија.
Нашите млади фудбалери првиот тренинг го одработија на стадионот „Борис Трајковски“, а амбициите се јасни – борба за висок пласман и изненадување против фаворитите.
„Нормално е да се надеваме на големи работи и борба за првите места на табелата. Играме против две многу сериозни и квалитетни репрезентации, Полска и Италија. Од друга страна, како генерација имаме квалитет и мотив да одиграме најдобро. Подготвени сме, тимот е сплотен и секогаш сме среќни кога сме дел од националниот тим. Одиме да се надигруваме со сите, да победуваме и да донесеме радост на нашите навивачи,“ изјави младиот репрезентативец Матеј Гаштаров.
