Македонската кошаркарска надеж Ања Начевска ќе ги напушти редовите на Вардар и ќе го продолжи развојот во соседна Србија, каде што ќе го носи дресот на амбициозниот тим Мега Баскет.
Начевска, која ги мина сите младински категории на „црвено-црните“ и настапуваше и за сениорскиот тим, со своите резултати и талент се искачи меѓу најдобрите македонски кошаркарки.
Во изминатите години со младинските тимови на Вардар освои бројни титули и МВП признанија, а во минатата сезона освои злато во М18 лигата и домашниот Куп.
Во 2023 година беше избрана за најдобра млада кошаркарка во Македонија, а на само 15 години дебитираше за сениорската репрезентација. Пред еден месец, за време на Европското јуниорско првенство, беше во конкуренција за МВП на турнирот.
Мега Баскет, клуб основан во 2009 година, се наметна како еден од најсилните клубови во Србија, освојувајќи го Купот на Србија во 2021 и 2024 година, како и шампионската титула во 2023 година.
Овој трансфер за Начевска е голем чекор во нејзината кариера и голем поттик за клубот кој се стреми кон нови успеси.
Со ова, Ања продолжува да го гради својот пат кон врвот на кошарката, претставувајќи пример за младите таленти од Македонија.
