Женскиот ракометен клуб Металург Автокоманда го заокружи списокот на засилувања за новата натпреварувачка сезона со ангажманот на две искусни ракометарки – Сара Цветановска и Сузана Зечевиќ.
Цветановска, 22-годишен кружен напаѓач, доаѓа од редовите на ЖРК Куманово, каде настапуваше од 2017 година. Ова е нејзина прва промена на клуб во кариерата, а веќе има и искуство во Европскиот Куп на ЕХФ. Од Металург очекуваат таа да внесе цврстина и борбеност на линијата од шест метри и да биде значаен дел од тимот во претстојните европски предизвици.
Втората нова ракометарка е црногорскиот бек Сузана Зечевиќ, која исто така доаѓа од Куманово. Со 32 години и долгогодишно искуство во македонската Суперлига, Зечевиќ е позната по својот преглед на играта, прецизниот шут и големата борбеност.
Со овие две имиња, клубот од Автокоманда го комплетира ростерот за новата сезона, во кој, покрај новите засилувања, остануваат и носителките на играта од минатата година. Со ваков состав, Металург Автокоманда влегува како еден од главните фаворити за освојување на трофеите на домашната сцена.
