Со драматично финале и одлична атмосфера, заврши 12. традиционален турнир во мал фудбал во Зрновци, кој беше дел од Илинденските спортски игри 2025. Турнирот, што се играше од 23 до 30 јули, мина во фер и коректна игра, а организатори беа Општина Зрновци и Локалниот младински совет.
Во големото финале се сретнаа двете винички екипи Магнум Казино и Липечко Поле. Финалето понуди вистинска фудбалска драма. Липечко Поле поведе со 2:0, но Магнум успеа да направи целосен пресврт и поведе со 4:2. Во последните две минути, Липечко Поле со два брзи гола успеа да израмни на 4:4, а победникот беше решен по изведувањето пенали. Магнум беше посмирен и посигурен, славеше со 6:4 и го освои првото место.
Третото место му припадна на тимот на Фабијан, кој исто така покажа солидни настапи во текот на турнирот.
По завршувањето, беа доделени и индивидуални признанија:
-
Најдобар играч: Мартин Малчев (Магнум Казино)
-
Најдобар стрелец: Алекс Соколов (Липечко Поле) – 13 голови
-
Најдобар голман: Бојан Карчов (Магнум Казино)
Општина Зрновци ја продолжува својата поддршка кон спортот и младите, со фокус на развој на спортската инфраструктура и промовирање здрави животни вредности кај новите генерации.
