Македонскиот шампион ЖФК Љуботен ќе гради тим со кој следната сезона ќе се обиде да ја одбрани двојната круна, но и да оствари голем успех во квалификациите за Лигата на шампионите.
Екипата моментално ја темпира формата во Златибор, Србија, но паралелно се работи и на трансфер-пазарот со ангажман на проверени и сигурни имиња кои треба да го подигнат квалитетот на тимот.
Искусната голгетерка Улза Максути е ново засилување за тетовскиот клуб. Таа доаѓа од Унје Кадин (Турција), носејќи со себе меѓународно искуство. Максути е репрезентативка на Македонија, а 26-годишната стружанка во кариерата настапувала за матичниот клуб АС Јунајтед (Струга) во два наврати, како и за Истатов.
Нејзиниот прв интернационален ангажман беше токму во турскиот шампионат, каде настапуваше во пролетниот дел од сезоната 2024/25, од јануари до јули 2025 година.
Максути ќе биде задолжена за голови во нападот на ЖФК Љуботен, кој добива проверен и сигурен напаѓач што во изминатите сезони редовно беше меѓу најдобрите стрелци.
Како што веќе информиравме, клубот активно работи и на унапредување на инфраструктурата во село Желино. Се врши санација на базата мотел „Плави“, со што ќе се добијат целосно реновирани соби и ресторан, каде што ќе бидат сместени фудбалерките.
