Прволигашот Шкупи го промовираше Ринор Ајдини како ново засилување, со кое се засили во средината. 24-годишниот играч за врска доаѓа од редовите на Гостивар.
Ајдини носи стабилност и ќе биде освежување во редовите на прволигашот од Чаир за новата сезона.
„Со задоволство ви го претставуваме најновото засилување на нашиот тим — Ринор Ајдини е официјално нов член на ФК Шкупи! Со својата посветеност, квалитет и борбеност, Ринор носи стабилност и нова енергија во нашите редови. Очекуваме да биде клучен дел од нашата мисија во сезоната што следува. Семејството на сино-белите расте и се зајакнува секојдневно. Со играчи како Ринор, иднината е полна со надеж“, велат од клубот.
Во својата кариера Ајдини покрај за Гостивар има настапувано и за Работнички, Кадино, Тетекс и хрватски Драговољац. Новото засилување на Шкупи минатата сезона одигра 21 натпревар во првенството постигнувајќи еден гол, а забележа и една асистенција, додека пак во Купот одигра три натпревари, а постигна и еден гол.
