Македонскиот фудбалски интернационалец Љупче Дориев се најде во идеалниот тим на 13. коло од шампионатот на Узбекистан, благодарение на одлучувачкиот гол што го постигна во 83. минута од натпреварот, со кој му ја донесе победата на Согдиана против Хоразм Ургенч.
Дориев сезонава има одлична форма, со вкупно седум постигнати голови се наоѓа на второто место на листата на најдобри стрелци во првенството. Дополнително, запиша и две асистенции, со што е еден од најзаслужните за успесите на својот тим.
Фудбалерот кој кариерата ја градел низ клубови како Академија Пандев, Шкендија , очигледно пронајде идеална средина за напредок и нови успеси токму во Узбекистан.
Со секој изминат натпревар, Дориев ја оправдува довербата на тренерот и сè повеќе се истакнува како еден од најдобрите странски фудбалери во Узбекистанската Суперлига. Неговата форма не поминува незабележано ниту кај љубителите на фудбалот во Македонија, каде често се дискутира за негово евентуално враќање во националниот тим.
