Беса од Сарај е последниот патник во Трета лига – Север, откако славеше над Бујковци
Екипата на Беса од Сарај е последната екипа која ја пополни Третата македонска фудбалска лига – Север за следната сезона 2025/2026, откако во баражот славеше над Бујковци преку пенал рулет.
Одличен натпревар пред се во вториот дел кога имаше поголема жар во самата игра. Амар Шабани во 15. минута со гол од белата точка го отвори резултатот за 0:1, а веќе по 27. минута Шабани ја казни грешката на голманот на Бујковци, Филип Петрушевски и ја стресе мрежата за 0:2 на полувреме.
Во второто полувреме екипата на Бујковци тргна во обид да дојде до брз гол и стигна во 73. минута кога по една мешаница пред голот на Беса, Антонио Петровски погоди за 1:2.
Следуваа неколку опасни шанси за екипата на Беса, но немаше среќа во реализацијата, па затоа во 95. минута стигна казната, откако Антонио Петровски погоди од белата точка за 2:2, а капитенот на тимот од Сарај, Љавдрим Палику доби втор жолт картон и со тоа го напушти теренот.
Пред изведувањето на пенал серијата црвени картони после мечот добија Денис Сали и тренерот Кадир Неџипи.
Во првата пенал серија Антонио Петровски и Амар Шабани не погодија, а интересно е што во регуларниот дел и двајцата беа двојни стрелци, а по еден гол постигнаа од белата точка.
Во втората серија погодија Васко Ристески и Фуркан Саити, а пак во третата серија не погодија Александар Алексиќ и Венхар Незири.
Следуваше четврта серија во која Кристијан Стојановски не погоди, а пак Муртезан Незири беше сигурен за Беса, а во петтата серија погодија Марио Антевски и Омер Зендели.
Веднаш по голот на Зендели започна големата радост кај навивачите на Беса и играчите за влезот на тимот од Сарај во Трета лига – Север.
Ова беше бараж на поразените екипи од претходниот бараж, откако екипата на Бујковци загуби од Лопате со 0:2 со што тимот на Лопате кој беше шампион на ОФЛ Куманово влезе во Трета лига – Север, а пак Беса преку пенали загуби од Отља, откако во регуларниот дел беше 1:1, а во пенал серијата подобра Отља која како шампион на ОФЛ Липково оди во Трета лига – Север.
Во новата сезона во Трета лига – Север ќе играат Фортуна, Еуромилк ГЛ, Куманово, Ржаничино, БВК Коњаре, Аеродром, Беса Влазрими, Пчиња, Кадино, Башкими Љуботен и новите третолигаши Студеничани, Отља, Лопате и Беса од Сарај.
Од Трета лига – Север испаднаа Риниа 98, Њу Старс и Академија Илинден.
