На Градскиот стадион во Македонска Каменица се одигра финалниот натпревар за апсолутен шампион во Третата лига за помлади пионери. Во големото финале, екипата на Кул Здравје од Скопје со резултат 1:3 славеше против домаќинот Каменица Саса.
Скопјани дојдоа до брза предност со два рани погодоци, кои се покажаа како клучни за исходот на натпреварот. Атанасие Жепчевски беше двоен стрелец – погоди во 4. и 7. минута за рано водство од 0:2. Во 38. минута Стефан Стефаноски зголеми на 0:3, со што Кул Здравје ја заокружи својата доминација во првото полувреме.
Во второто полувреме, „рударите“ од Каменица се обидоа да се вратат во игра, но единствениот погодок го постигнаа во 79. минута преку Александар Митевски, кој го постави конечниот резултат 1:3.
Каменица Саса имаше одлична сезона во Трета лига помлади пионери – А-лига, завршувајќи на првото место со биланс од 16 победи, 3 ремија и само 2 порази. Тимот беше најдобар дефанзивно со само 10 примени гола и постигна 44 погодоци.
Кул Здравје пак, доминираше во Б-лигата – со 17 победи и 3 порази на 19 одиграни натпревари, постигна импресивни 76 гола и имаше најдобра одбрана со 15 примени погодоци.
Со овој триумф, Кул Здравје ја круниса својата извонредна сезона и заслужено го понесе трофејот за апсолутен шампион во Третата лига за помлади пионери во сезоната 2024/2025.
Фудбалскиот клуб Кул Здравје важи за клуб кој е расадник на големи фудбалски таленти.
