tЗавршницата од Општинската фудбалска лига на Куманово или Четвртата лига по ранг на натпреварување ќе се одигра на фудбалскиот терен во Агино Село.
На овој фудбалски терен кој е перфектен и во многу наврати има известувано Спортска Мрежа за одличните услови кои ги нуди овој терен ќе се одигра плеј-офот за влез во Третата македонска фудбалска лига – Север.
Од фудбалскиот клуб Македонија Агино истакнаа дека ќе го дадат максимумот за да има одлична организација на завршницата.
„Почитувани љубители на фудбалот, сакаме да ве известиме дека нашиот терен е избран за организирање на плеј-оф натпреварите за бараж во повисок ранг! Нашиот тим заедно со управата ќе го даде максимумот за да биде организирано на највисоко ниво! За љубителите на фудбалот сакаме да ве известиме дека може да уживате и на ладно пиво и добро мезе со уште подобро друштво“, се вели во соопштението на ФК Македонија Агино.
Во сабота со почеток од 15 часот се игра првиот меч меѓу Лопате и Четирце, додека пак од 17 часот ќе се соочат Јуниор со Победа.
Победниците од овие два натпревари ќе се соочат во финалето кое е закажано за 25 мај, а победникот од финалето може да обезбеди и директен влез во Трета лига – Север, но може да игра бараж со еден од шампионите во останатите Општински лиги кои територијално припаѓаат на ТМФЛ – Север, тука се скопските општински лиги, ОФЛ Липково и ОФЛ Куманово.
Во текот на следните денови ќе информираме подетално околу пласманот во Трета лига – Север.
