Македонскиот тенисер Калин Ивановски не успеа да се пласира во главната фаза на Челинџерот во Загреб (категорија 75), откако беше поразен во финалето од квалификациите од искусниот Босанец Мирза Башиќ со 2-1 во сетови (6-4, 3-6, 7-6(1)) по голема борба што траеше 2 часа и 22 минути.
Натпреварот понуди многу пресврти, со изедначена игра од самиот почеток. Ивановски одлично го отвори мечот со ранен брејк и водство од 2:0, но Башиќ брзо се врати и направи пресврт за 4:2. Иако Калин успеа да врати брејк за 4:4, противникот го доби првиот сет со 6:4.
Во вториот сет, Ивановски презеде контрола. Со единствениот брејк во шестиот гем, македонскиот тенисер поведе со 4:2, а сетот го затвори со 6:3, израмнувајќи на 1-1.
Третиот сет повторно донесе неизвесност. Калин направи брејк во третиот гем и поведе со 2:1, а предноста ја задржа до 5:3. Сепак, Башиќ успеа да се врати и израмни на 5:5, а сетот заврши со тај-брејк. Таму, Башиќ доминираше и го освои тај-брејкот со убедливи 7-1, со што обезбеди место во главниот жреб.
Ивановски за настапот во финалето на квалификациите ќе освои два ATP поени.
