Кошаркарите на Соколи од Штип претрпеа тежок пораз на првиот меч од полуфиналето на плеј-оф серијата за влез во Првата кошаркарска лига, откако штипскиот тим загуби на гостувањето кај Ангели со превисоки 105:57.
Екипата на Ангели беше одлична на овој меч и забележа голема победа, а второто соочување ќе биде во Штип во среда.
Тренерот на Соколи, Тоше Димиќ, после овој голем пораз и се извини на штипската кошаркарска јавност и најави борба до последната надеж.
„Натпреварот мора да се заборави што е можно побргу! Во среда, на реваншот мораме да победиме и да избориме мајсторка за финале. Ако ја анализираме играта, јасно е дека КК Ангели имаа шутерско шоу, а од друга страна ние го имавме најлошото шутерско издание годинава. Како тренер на тимот, чувствувам одговорност и од мое име и името на целиот тим се извинувам на целата штипска кошаркарска јавност за катастрофалната игра. Но сакам да истакнам, не застануваме тука! Кошарката се игра до крај, до последниот атом, до последната капка пот, до последната трошка надеж. Одиме на победа во среда пред преполна сала“, вели тренерот на КК Соколи, Тоше Димиќ.
Екипата на Маџари со 83:75 славеше победа над МЗТ Скопје Уни Банка и на вториот меч е бара нова победа и така да стигне до финале.
