Вчера беше отворено 24. коло на Третата македонска фудбалска лига – Запад со три натпревари, а на воведните три меча беа постигнати 15 гола
Тетекс славеше убедлива победа од 2:5 над Ренова на гостински терен во Џепчиште. Резултатот го отвори Ерзен Ходаи во 16. минута за 1:0, а веднаш по три минути Ерјон Елмази погоди за 1:1. „Гипсарите“ дојде до нова предност со гол на Ери Абдулахи постигнат во 23. минута за 2:1.
До крајот на првиот дел „штофарите“ преку Меритон Салији и Агон Елмази направи пресврт на 2:3. Во вториот дел со новите погодоци на Елмази и Салији беа поставени конечните 2:5.
Речица на домашен терен дојде до победа од 2:1 над екипата на Велазерими од Слатино. Домаќинот на полувреме имаше минимална предност од 1:0 со голот на Арѓент Зибери. Во вториот дел Милазим Вељии постигна гол во 63. минута за 1:1, а потоа во 88. минута Адхурим Иљази беше прецизен за конечни 2:1.
Екипата на Љуботен дојде до многу важна победа од 3:2 на домашен терен над Џепчишти. Сите пет погодоци беа постигнати во првиот дел, а во вториот дел мрежите мируваа.
Јордан Тошевски во 18. минута погоди за 1:0, само една минута подоцна Беким Садики постигна гол за 1:1. Следуваше пенал за домашниот тим, а Филип Билбилоски беше прецизен за 2:1 и нова предност за Љуботен. Но, радоста траеше само четири минути откако Садики со втор гол израмни одново на 2:2.
Во 35. минута главниот судија Ибраими Бардхиљ покажа на белата точка за Љуботен, а и овој пат Билбилоски беше прецизен за конечни 3:2. Во вториот дел голови немаше, но имаше црвен картон за Тео Симњаноски во 75. минута.
Колото ќе се комплетира денес со три натпревари. Камјани ќе игра со Зајази, Напредок во Кичево ќе го пречека тимот на Дрита, а пак Вардар во Брвеница ќе игра со Доброшти.
