Академија Пандев Брера од Струмица уште еднаш ја потврдува својата водечка улога во развојот на млади фудбалски таленти во Македонија. Клубот се пласира во финалето на Купот на Македонија со сите три младински категории — пионери, кадети и младинци — со што стана единствениот клуб кој ќе има тројна финална претстава оваа сезона.
Во полуфиналните натпревари, пионерите беа убедливи против ФК Македонија ЃП, славејќи со 3:0, и во финалето ќе се соочат со екипата на ФК Пелистер. Кадетите одиграа возбудлив меч против ФК Работнички, кој го добија со 3:2, и финалниот предизвик за нив ќе биде екипата на ФК Шкупи. Младинците, пак, во полуфиналето минимално ја совладаа екипата на ФК Вардар со 1:0, со што обезбедија пласман во финалето против ФК Брегалница.
Овој историски успех е потврда за квалитетната и професионална работа која се спроведува во Академијата. Преку посветена работа на тренерите и континуиран развој на младите фудбалери, клубот ја гради иднината на македонскиот фудбал. Академија Пандев-Брера веќе важи за расадник на таленти, што го потврдува и бројот на репрезентативни повици за младите категории на македонската национална селекција.
Минатата сезона младинците и помладите пионери станаа шампиони во своите конкуренции, а оваа година клубот има реална шанса да направи историја со освојување на три Куп-титули.
