По иницијативата на Општинскиот фудбалски сојуз Струмица за формирање на Општинска фудбалска лига за сезоната 2025/2026, ФК Огражден од Ново Село официјално ја потврди својата одлука да учествува со сениорска екипа во новото натпреварување. Одлуката била донесена едногласно на последниот состанок на управниот одбор на клубот.
Претседателот на клубот, Миле Ѓоргиев, истакна дека ФК Огражден располага со сите основни предуслови за функционирање на еден сениорски тим, вклучително и со стандарден фудбалски терен, систем за наводнување, косилка, професионална опрема за обележување и целосна спортска опрема. Ѓоргиев нагласи дека следува период на интензивни состаноци со сите чинители во проектот, со цел прецизирање на организациските и техничките детали.
„ Ги повикуваме сите поранешни фудбалери на ФК Огражден, поранешна управа, да даваат идеи, да го споделат своето искуство од минатото со нас, за заедно да го издигнеме клубот на посакуваното ниво“, изјави Ѓоргиев.
Тренерската палка ја презема Никола Аврамов, кој со голема амбиција влегува во проектот, истакнувајќи дека Ново Село заслужува стабилен и квалитетен фудбалски клуб.
„Имаме доволно време до почеток на сезоната да работиме на добри засилувања, тука се и нашите млади фудбалери за кои ќе биде искуство повеќе секој натпревар. Ново Село заслужува квалитетен фудбалски клуб и веруваме во остварување на зацртаните цели“, рече Аврамов.
ФК Огражден со оваа одлука испраќа јасна порака дека Ново Село повторно ќе биде дел од фудбалската сцена, а амбициите на клубот се насочени кон стабилност и долгорочен развој.
