Речиси сите екипи се познати за баражот за Втора македонска фудбалска лига. Пет третолигаши и еден второлигаш во борбата за влез во Втора лига.
Како што веќе информираше Спортска Мрежа, екипите на Слога Виница (шампион на Трета лига – Исток), Преспа (шампион на Трета лига – Југозапад), големо Коњари (шампион на Трета лига – Југ), Тетекс (шампион на Трета лига – Запад) и Шкендија Арачиново (шампион на Трета лига – Север) се петте третолигашки шампиони, како и Осогово кој како второлигаш ќе игра бараж за опстанок.
Овие шест екипи преку ждрепка ќе формираат три двојки кои ќе се борат за влез во Втората македонска фудбалска лига за следната натпреварувачка сезона 2025/2026.
Датумот за одигрување на баражите е 24 / 25 мај, односно сабота / недела, а дополнително според ждрепката ќе бидат утврдени и стадионите каде ќе се одиграат овие три натпревари.
Во текот на оваа недела следете ја ексклузивната емисија на Спортска Мрежа за тоа како ќе се пополни Втората лига, откако Воска Спорт и Гостивар се откажаа од натпреварувањето во Прва лига!
