Дебитантот Слободен конечно се израдува на првата сезонска победа, откако во рамки на воведниот меч од последното 14. коло на Втората женска фудбалска лига со 3:1 триумфираше над Борец од Велес.
Повеќе моменти треба да се истакнат за денешниот меч, домашниот тим немаше ниту една фудбалерка на клупата за резерви, а велешкиот тим допатува со само една фудбалерка на клупата за резерви.
Во првиот дел немаше погодоци, мрежите беа мирни и на двете страни, па во второто полувреме и двете екипи ги бараа трите бодови.
На стартот од вториот дел капитенката на домашната екипа Јана Ацковска постигна гол за водство од 1:0, а тоа предизвика голема радост кај домашниот тим. Во 52. минута екипата на Борец остана со играч помалку на теренот, откако Тамара Милошевиќ заработи директен црвен картон, а причината за доделување на истиот како што е заведено во записникот е неспортско однесување.
И со играч помалку на теренот Борец успеа да израмни на 1:1 во 61. минута преку Ема Неделкова.
Во 85. минута Александра Спасова покажа на белата точка, а Ацковска беше сигурна од белата точка за 2., а три минути подоцна Спасова досуди уште еден пенал за домашниот тим, овој пат Лилјана Бошнаковска постигна гол од белата тока за конечни 3:1.
Едно е сигурно, Борец сезоната ја завршува на последното место со четири бодови на своето конто, а пак Слободен може да заврши на шестото место, но ќе мора да го сочека утрешниот меч меѓу Победа Валандово и Плачковица, бидејќи со реми или триумф екипата од Валандово ќе биде шеста, а Слободен ќе биде седми.
