Дербито на 13. коло во Втората женска фудбалска лига заврши со победа за Вардар, откако славеше со 1:2 над Билјанини Извори, и тоа преку пресврт. Херој за Вардар беше искусната Теодора Јанковска, која ги постигна двата гола.
Тежок натпревар за двете екипи, пред сè од психички аспект, на што се осврна и тренерката на Вардар, Теодора Димитровска, во изјава за Спортска Мрежа. Мечот беше од капитална важност за двете страни, со бројни шанси и моменти на двете страни, но Вардар ги искористи своите подобро и затоа го доби мечот.
Натпреварот беше фер и коректен од двете страни. Ева Андонова во 42. минута донесе водство за Билјанини Извори од 1:0, резултат со кој охриѓанки заминаа на полувреме.
Во второто полувреме, Вардар бараше брз погодок и истиот го постигна во 61. минута, кога Теодора Јанковска ја стресе мрежата на Николија Стојановска за 1:1.
Изедначувањето ја разгоре играта и на двете страни, кои тактички настојуваа да стигнат до нов гол. Во 75. минута, Стојановска повторно капитулираше, откако 23-годишната Јанковска постигна свој втор гол за водство од 1:2.
До крајот, Билјанини Извори се обидуваше да се врати во игра и создаде неколку шанси за израмнување, но немаше успешна завршница, додека Вардар мудро го чуваше водството стекнато во 75. минута и на крај ја потврди победата од 1:2.
Сега Вардар останува на второто место и сигурно ќе игра бараж за можна промоција во Првата лига. Ова ќе биде нов бараж за Вардар, откако минатата сезона тимот загуби во Велес од прволигашот Топ Гол. Сепак, пред тоа, во последното коло Вардар на домашен терен ќе се соочи со Кочани, во директен дуел за титулата и за директна промоција во елитата. Победникот од тој натпревар ќе обезбеди директен пласман во Првата женска фудбалска лига, додека поразениот ќе игра бараж за влез во елитата на македонскиот женски фудбал.
„Тежок натпревар, пред сè од психички аспект, и по нивното водство пред крајот на првото полувреме, девојките покажаа карактер и дисциплина на теренот. Шансите ги имавме и ние и екипата на Билјанини Извори, но победата заслужено ја добивме. Сакам да им честитам на моите девојки што и покрај притисокот успеавме да останеме на погорното место во однос на противникот“, изјави тренерката на Вардар, Теодора Димитровска за Спортска Мрежа веднаш по мечот во Охрид.
Од охридскиот клуб им ја честитаа победата на Вардар и им посакаа среќа понатаму.
„Фер и коректна игра, им честитаме на победата на Вардар и им посакуваме многу среќа понатаму“, велат од ЖФК Билјанини Извори во кратка изјава за Спортска Мрежа.
Следниот викенд ќе се одиграат натпреварите од последното, 14. коло, со што ќе заврши сезоната во Втората женска фудбалска лига. Потоа ќе следи баражот за пополнување на Првата лига.
