Анализа на Спортска Мрежа за баражите за влез во Третата македонска фудбалска лига. Пред нешто повеќе од три месеци започнавме да го наметнуваме прашањето зошто шампионите во Трета лига да играат бараж за влез во Втора лига, кога самиот момент штом тие станале шампион треба да имаат загарантиран влез во Втора лига односно повисок ранг на натпреварување.
Веќе неколку сезони петте шампиони во Трета лига (Југозапад, Запад, Север, Југ и Исток) играат баражи со екипата која ќе биде на 14. место во Втора лига бараж за влез во Втора лига.
Играњето на баражи може да ја фрли во вода цела успешна сезона на еден третолигаш. Во минатото екипата на Влазерими од Кичево две сезони по ред беше шампион во Трета лига – Запад и две години по ред ги губеше баражите, пред две сезони од Башкими, минатата сезона од Борец. И сега се отвара прашањето кој ќе биде мотивот на екипата да се натпреварува? Како третолигаши да бараат генерални спонзори со цел да може да се надоградуваат и да се борат за влез во Втора лига?
Дополнително, како за пример, одреден клуб во Трета лига може да нема ниту еден загубен натпревар во текот на целата сезона, да дојде во бараж и тука резултатот да биде нерешен и на пенали да загуби, несреќно, екипа која била цела сезона прва без пораз!
Ова мора да се промени ако сакаме Трета лига да оди во нагорна линија, во секој друг случај тој бараж натпревар ќе се рефлектира негативно кон третолигашите и нивниот развој и можноста за барање на инвеститор или генерален спонзор и слично.
Погледнете ја анализата на Спортска Мрежа од пред три месеци каде разговаравме на темата за баражите на третолигашите и можноста Трета лига да се прекрои со регионите, неофицијално како што дознаваме, а откако направивме неколку емисии на оваа тема веќе сериозно се размислува за менување на пропозициите и овозможување на шампионите во Трета лига директен влез во Втора лига.
Во следниот период ќе реализираме емисија токму на оваа тема.
- АНАЛИЗА НА СПОРТСКА МРЕЖА: ТРЕБА ЛИ ШАМПИОНИТЕ ВО ТРЕТА ЛИГА ДА ИГРААТ БАРАЖ ЗА ВТОРА ЛИГА?
