Денес со еден натпревар ќе биде отворено 10. коло на Втората женска фудбалска лига, дебитантот Слободен го пречекува фаворитот Вардар, во меч каде правдата ќе ја дели Моника Даштевска од Скопје, а истиот ќе започне во 11:00 часот.
Слободен ќе ја бара дури првата сезонска радост, а пак Вардар оди на нови три бодови во трката да го сочува второто место кое води кон баражот за можен влез во Прва лига.
Утре во Македонски Брод екипата на Порече ќе се соочи со Победа Валандово, во меч каде домашниот тим ќе биде фаворит за трите бодови.
Натпреварот ќе започне во 12:30 часот, а правдата ќе ја дели Јована Максимовска од Скопје.
Радовишка Плачковица на домашен терен ќе се соочи со лидерот Кочани, кој како голем фаворит доаѓа да ги освои трите бодови и со тоа да биде чекор поблиску до потврда на враќањето во Првата лига.
Правдата на натпреварот ќе ја дели Виолета Јанчева од Гевгелија, а мечот ќе започне во 12 часот.
„Фенерџијата“ Борец на домашен терен ќе има повеќе од тежок меч со Билјанини Извори, тимот од Охрид во Велес доаѓа како апсолутен фаворит за освојување на трите бодови, со што Билјанини Извори ќе продолжи да го напаѓа второто место кое води кон баражот за можен влез во Прва лига.
Правдата ќе ја дели Александра Спасова од с. Мустафино, Свети Николе, а мечот ќе започне во 11 часот.
