Во рамки на денешното 17. коло на Втората лига, на стадионот „Благој Истатов“ во Струмица екипата на Беласица против Вардар Неготино забележа убедлива победа од 4:0. На полувреме струмичани имаа предност од 1:0 преку автоголот на Димитар Јанкулов, а во вториот дел повратникот Алекснадар Коцев, капитенот Александар Милушев и Александар Богданоски ги поставија конечните 4:0.
Арсими на домашен терен се соочи против Охрид каде исходот беше поделба на бодовите (1:1). Бојан Затуроски во финишот на првиот дел погоди за 0:1, а во вториот дел најдобриот стрелец на домашниот тим Аљбин Рамадани ги постави конечните 1:1.
Дербито меѓу лидерот Македонија ЃП и Башкими кој атакува на место за Прва лига заврши со минимална победа за гостите од 0:1 преку голот на искусниот Хусеин Демири.
Поранешните прволигаш Борец и Победа во Велес се соочија во дерби од дното на Втората лига за опстанок, каде прилепчани преку повратникот Филип Димоски се израдуваа на минимална победа од 0:1, но победа вредна злато за директен опстанок.
На Градскиот стадион во Штип фаворитот Брегалница против Новаци забележа победа од 3:1. Димитриј Димитриевски постигна гол за 1:0 на полувреме, а во вториот дел Новаци преку Христијан Торнески дојде до 1:1. Тоа направи притисок врз Брегалница која преку Давид Калпачки, кој е најдобар стрелец на „сините“ дојде до 2:1 во 81. минута, а Благој Хаџи-Кимов во 87. минута ги постави конечните 3:1.
Детонит Плачковица на домашен терен против Каменица Саса доживеа пораз од 1:2. Кристијан Чурлиновски беше двоен стрелец за „рударите“, а пак Димоски си постигна автогол.
Во Гевгелија се играше дербито на Југот меѓу Кожуф и Вардарски, каде искусниот голгетер Сашо Дуков беше стрелец на победничкиот гол за Кожуф за победа од 1:0.
Скопје на „Железарница“ во Автокоманда го пречека тимот на Осогово каде немаше голови и победник за 0:0.
