Викендов во Берово ќе се одржи голем меѓународен турнир во пинг понг. Од 13. до 15. септември малото гратче во Малешевијата ќе биде домаќин на големи спортски случувања, традицијата продолжува со одржување на големиот Меѓународен турнир во пинг понг – „Зегин Опен 2024“.
Натпреварите ќе се одигруваат во Спортската сала „Македонски Бранители“ во Берово. За сабота на 14. септември е предвидено дефиле на земјите учеснички, а за вечерта е предвиден голем концерт на македонската музичка група „Некст Тајм“ на Градскиот плоштад „Димитар Беровски“ во Берово.
Овој турнир привлече големо внимание на натпреварувачи од целиот свет што само по себе е потврда за голем и успешен турнир.
На турнирот учество ќе земаат покрај Македонија како земја-домаќин и Аргентина, Косово, Бугарија, Нигерија, Киргистан, Србија, Турција, Украина, Грција, Германија, Хрватска и Белорусија.
На овогодинешното издание од „Опен Зегин 2024“ учество ќе земаат вкупно 177 натпреварувачи. Во однос на категориите кои ќе бидат застапени на самиот турнир ќе бидат У-13, У-15, У-19, апсолутна категорија, категории кај ветераните 40-49 години, 50-59 години, 60-69 години и највозрасните 70+ години во машка и женска конкуренција.
1.600 евра е паричната награда за првото место во апсолутна категорија и во машка и женска конкуренција, а вкупниот награден фонд на „Зегин Опен 2024“ е 12.000 евра.
Компанијата Зегин и ППК Зегин се единствени спонзори и организатори на овој турнир, кој е најголем турнир од ваков карактер на Балканот и пошироко.
Спортски празник во прекрасното Берово, дојдете во оваа мало прекрасно гратче да уживате во пинг понг, во чист воздух, домашна и вкусна храна, добра музика и забава.
Спортска Мрежа ќе биде медиумски покровител на овој спортски настан и од Берово ќе ви ја доловиме атмосферата.
ПР текст
