Второлигашите Победа и Башкими одиграа пријателски натпревар со цел брусење на формата за пролетната полусезона која ќе започне на 15. февруари.
Натпреварот заврши без победник со по еден гол на двете страни за конечни 1:1. Победа прва дојде до водство во 15. минута од мечот, а пак Башкими преку новото засилување Фахрудин Ѓурѓевиќ во 38. минута ги постави конечните 1:1.
Двете екипи во пролетниот дел имаат различни цели. Победа сака сигурен и директен опстанок во Втората лига, со цел да не се повтори ланското сценарио кога преку браж се избори за опстанок во Втората лига, совладувајќи го шампионот на Трета лига – Север, Куманово. Од друга страна, пак, Башкими ќе води борба за влез во Првата лига, откако есенскиот дел го заврши на третото место или во бараж зоната со само бод негатива во однос на Брегалница која е втора.
Победа пролетниот дел го отвара токму против Брегалница, додека пак Башкими на домашен терен стартува против Борец од Велес.
