За околу месец дена или поточно на 9. март ќе започне пролетната полусезона во Третата македонска фудбалска лига – Југозапад, со натпреварите од 12. коло.
Три екипи ќе водат рамноправда борба за кој да биде шампион во Трета лига – Југозапад, а со тоа да го обезбедат и баражот за можен влез во Втората македонска фудбалска лига. Екипата на Преспа од Ресен е есенски шампион, тимот има 28 бодови на своето конто, втор е ланскиот шампион Кораби од Дебар со само бод помалку, а на третото место е Сатеска од Волино со 26 бодови.
Овие три екипи ќе водат пролетна трка за шампионската титула, а тоа ќе направи неизвесна пролетна полусезона во овој третолигашки регион.
Во рамки на 12. коло или прво пролетно коло екипата на Демир Хисар на домашен терен ќе игра токму со Кораби, екипа која лани како шампион не го помина баражот за влез во Втората лига, откако загуби од Вардарски, шампионот на Трета лига – Исток. Светлост од Кукуречани ќе игра со лидерот Преспа, новајлијата Света Троица од Охрид ќе се соочи со екипата на Сатеска од Волино.
Во Струга ќе се одигра Градско дерби меѓу Влазними и ланскиот второлигаш Караорман, Кравари ќе го пречека Евротип, додека пак Славеј од Мешеишта ќе се соочи со Велешта.
