Лидерот во Втората македонска фудбалска лига, екипата на Македонија ЃП, за пролетниот дел од сезоната го ангажираше 18-годишниот Тарик Демишоски, кој меѓу „лавовите“ доаѓа од редовите на охридска Воска Спорт.
Демишовски е повратник во тимот од Ѓорче, откако тој беше меѓу „лавовите“ во период од септември 2022 година до јуни 2024 година, кога замина во Воска Спорт. Претходно, тој беше дел од Њу Старс, Јанг Тим од Струга и струшки Караорман.
Македонија ЃП е есенски шампион во Втората лига, најискусниот, најквалитетниот, но дефинитивно и најскапиот тим во второлигашкото друштво во пролетниот дел како главен фаворит ќе треба да го потврди првото место, а со тоа Македонија ЃП експресно да се врати во Првата лига.
Пролетната полусезона тимот на Бобан Грнчаров го отвара на „Билјанини Извори“ против Охрид, во рамки на 16. коло кое на програмата ќе биде на 15. февруари.
