Синоќа во Богданци се одигра пријателски натпревар меѓу прволигашот Младост и суперлигашот Радовиш, кој заврши со победа за тимот од Богданци со резултат од 29:26. На полувреме резултатот беше 15:12.
Ова е втора победа за тимот на Младост против Радовиш, откако и пред една недела двете екипи се тестираа во реновираната СРЦ „25 мај“ во Радовиш.
Младост има суперлигашки амбиции и сака пласман во ракометната елита на Македонија, а тоа го покажува и преку овие две победи.
„Нашиот сениорски тим по втор пат го победи Суперлигашот РК Радовиш, во натпревар кој беше дел од подготовките за вториот дел од сезоната. Шанса за докажување добија сите играчи на нашиот тим и одлично сите ја искористија својата шанса“, велат од клубот.
Најдобар стрелец кај Младост на тестот против Радовиш беше Антонио Николоски, кој постигна осум гола, а го следеше Уча Гамзардиа со пет погодоци. Кај Радовиш новото засилување Томче Трајчевски имаше шест реализации.
За Спортска Мрежа од Младост потврдуваат дека во вториот дел од сезоната ќе водат борба за враќање во Суперлигата, затоа и се гради овој тим, кој преку овие тест натпревари покажа дека е зрел во таа борба за влез во Суперлигата.
Следен прјателски меч за Младост ќе биде против Мулти Есенс од Скопје, меч кој ќе се одигра во Богданци, а истиот е закажан за следниот викенд односно 15/16. февруари.
